البحر أعمق ولا الويب؟

اي حد بدأ يدرس البرمجة او حابب المجال دا وناوي يدرسه بيظهر في دماغه فكرة أنه يبقي هاكر وأنه ممكن يخترق اكونتات الناس علي الفيسبوك وبيسمع عن حاجة اسمها الديب ويب وان هي حاجة خطيرة مليئة بالهاكرز وأنه ممكن يدخله علشان يتعلم منهم بكل بساطة وللأسف الفكرة الخاطئة دي أصبحت منتشرة بطريقة مرعبة عند معظم الناس اللي عندهم شغف لتعلم البرمجة , علشان كدة لازم نوضح الفروق اللي لازم الناس تفهمها وبلاش نكون سطحيين .

إذا اعتبرنا إن الأنترنت في العالم كله عبارة عن جبل من الجليد منقسم الي 3 طبقات فيمكن تشبيه الجزء السطحي فوق الماء بالأنترنت السطحي(public web) وتحت سطح المياه يحتوي علي طبقتين وهما الديب ويب والدارك ويب ومن هنا نقدر نوضح الفرق بين ال3 طبقات .

ايه الفرق بين البابليك ويب(WWW) والديب ويب والدارك ويب والدارك نت ؟

1)الpublic web وهو الانترنت السطحي اللي بيحتوي بداخله علي محركات البحث العادية مثل : (google , yahoo , bing )

 واي حد ممكن يدخل علي الأنترنت السطحي من خلال المتصفحات ويستخدم محركات البحث والبحث عن اي شئ يريده زي ما كلنا بنعمل عادي والجزء دا من الانترنت بيحتوي أيضا علي مواقع التواصل الإجتماعي زي فيسبوك وتويتر وانستجرام وخلينا نقول النقطة الأهم وهو أنه بيمثل 4% فقط من الأنترنت في العالم كله يعني كل اللي إحنا بنعمله من استخدام مواقع التواصل الإجتماعي والمعاملات دي والأبحاث اللي احنا بنعملها , كل دا لا يتعدى ال4% من الانترنت.

الديب ويب

2) الديب ويب وهو الجزء الأعمق واللي أسمه بيحتوي علي كثير من الغموض وهو مصطلح قديم ولكنه انتشر مؤخرا وأصبح شائع بين المستخدمين ولكن في مشكلة لابد من توضيحها وهي أرتباط اسم الديب ويب بالقرصنة والأعمال الاجرامية ولكن دا مش ضروري فالديب ويب يحتوي علي كثير من الأشياء التي تعتبر قانونية ومشروعة ولكن أصحاب المواقع دي بيفضلوا حفظينها بعيدا عن السطح وهي المواقع اللي بتحتوي علي قواعد البيانات ومعلومات سرية ومن الجدير ذكره أن فائدة الديب ويب هي اخفاء أعمالك اللي مش عايز حد يشوفها او مزيد من الخصوصية.

الدارك ويب

3)الدارك ويب ومع سماع كلمة دارك ويب تزداد الأمور اثارة.
لانه بيحتوي علي امور اكثر بشاعة وعلي كل ما يخطر ببالك من اول الاتجار بجميع انواع المخدرات مرورا بالاتجار بالاسلحة واستئجار قاتلين مأجورين وصولا الي الاتجار بالبشر والاعضاء البشرية وبعض التنظيمات الارهابية استخدمت الدارك ويب لاتمام اتصالاتهم بشكل سري وبعيدا عن أعين الحكومات .

الدارك ويب تم اختراعه لأول مرة في اواخر التسعينيات من القرن الماضي بواسطة المعامل البحرية الامريكية وقد كان الغرض منه هو ايصال المعلومات والاتصالات بشكل أمن وسريع ولكن انقلب السحر علي الساحر وكل استخداماته اصبحت تصب في اتجاه الجرائم الالكترونية ويعتبر الدارك ويب جزء من الديب ويب والاتنين بيمثلوا 96% من الانترنت في العالم .

ازاي ادخل علي الديب ويب والدارك ويب :

علشان تدخل علي المواقع دي لازم تستخدم شبكة تسمي (Tor) وهو اختصار (The onion router) اللي بيمنحك صلاحية الدخول للمواقع اللي بتنتهي ب(onion.) واسمه مستوحى من طريقة عمله لان الشبكة دي بتتكون من طبقات الاتصالات واللي بيسلموا بعض لغاية ما نوصل للطبقة النهائية مع استخدام تشفير معقد في كل طبقة ودا بيخلي فك التشفير مستحيل نظريا ومحتاج وقت ومجهود كبير .
وكمان لازم تستخدم برامج (VPN) علشان تخفي موقعك
مع عدم استخدام اي متصفحات تانية لان جهازك ممكن يتم اختراقه.

الدارك نت

4)الدارك نت ودا جزء من الدارك ويب وموجود فيه الشبكات الاكثر تعقيدا وشبكات خاصة بين اشخاص محددين وبيعملوا فيها كلمات مرور علشان محدش يدخل علي الشبكات دي غيرهم وتسمى P2P او F2F .

واخيرا بعد توضيح الفروق لو في نصيحة ممكن نقولها هتكون ابعد عن كل المواقع دي وبلاش الفضول يوصلك انك تخوض تجربة الدخول فيها تجنبا للمشاكل اللي ممكن تضرك او تضر اجهزتك وطالما انت عندك وقت تكتشف حاجة زي كدة يبقي استغل وقتك في تعلم حاجة مفيدة تنفعك في المستقبل.

اترك تعليقاً