First Step 8

“واثق الخُطى يمشي ملكًا”

دايمًا بتكون أول خطوة في كل مرحلة جديدة في حياتك، هي أصعب خطوة، فبتحتاج اللي يساعدك فيها عشان تعرف تكمل باقي الخطوات، الخطوة دي هي الأساس اللي هتبني عليه باقي الخطوات، عشان كده احنا موجودين، عشان نعرفك إزاي تاخد أول خطواتك في طريق جديد عليك، طريق حلمك. هنكون جنبك فأول خطوات ليك في مشوار الكلية، عشان تسيب أثر من أول خطوة.. عزيزي الحاسوباتي, أهلًا بيك في First Step Event.

إيه هو إيڨينت First Step؟

هو إيڨينت لطلبة كلية حاسبات وذكاء اصطناعي أو (حاسبات ومعلومات)، وهدفه مساعدة الطلبة وتعريفهم بالكلية، والأقسام، وبعض المجالات، عن طريق دكاترة ومعيدين وأشخاص في شركات كبيرة.

بدأت فكرة الإيڨينت عن طريق مجموعة طلبة هدفهم مساعدة الطلبة الجدد لكلية حاسبات ومعلومات، وبعد كده تطورت الفكرة، وأصبح الإيڨينت عادة تقدمها مايندرز كل عام عشان تساعد الطلبة، والإيڨينت اتعمل 7 مرات قبل كده، وده المرة رقم 8.

ليه اسمه First Step؟

من الترجمة كده المعنى “أول خطوة”، وده عشان من بعد ما خلصت ثانوي أنت دخلت مرحلة جديدة تمامًا، وبداية كل مرحلة بتبدأ بقرار، وبعد القرار بتبدأ أول خطوة ليك.. وده اللي هنساعدك فيه في الإيڨينت عشان تقدر تكمل باقي حياتك في حاسبات بشكل سليم.

هتخرج بإيه من First Step؟

  • هتعرف أكتر عن حاسبات، وهتتعمق أكتر في كل ما يتعلق بيها.
  • هتعرف أقسام الكلية، عشان تقدر تحدد بشكل مبدئي أنت ناوي على إيه؟
  • هتعرف معظم المجالات اللي شغالة اليومين دول، وإزاي تبدأ فيها؟
  • هتستفاد من ناس عندها خبرة، تمكنك إنك تعرف عن كل حاجة بيتكلموا فيها.
  • هتتعلم حاجات هتساعدك بجانب دراسة الكلية، عشان تقدر تطور الجانب الشخصي اللي هيشغلك مع خبرتك.
  • هتفهم نظام دراسة الكلية، وإي هو GPA؟ وهل مهم في الشغل ولا لأ؟
  • هتشيل الخوف والحيرة من جواك، وهتعرف قد إيه أنت دخلت كلية عظيمة.

أنت فين؟

من بعد ما خلصت ثانوي، وبداية دخولك حاسبات، أنت بتحس إنك تايه ومش عارف أنت فين؟ وبيدور في عقلك اسئلة كتير وبتختلف من شخص لآخر..

  • هشتغل إيه؟
  • هى الكلية فيها إيه؟
  • هيبقى إيه المسمى الوظيفي لما اتخرج؟
  • هل قرار إن أسيب هندسة واخش حاسبات صح؟
  • هل حاسبات صعبة، ومرعبة زى ما ناس كتير بتقول؟
  • ضاعت هندسة، ودخلت حاسبات، هل هعرف اكمل في الكلية؟
  • هو انا كطالب علمى علوم، هقدر اتعامل مع الرياضة بتاعت الكلية؟

الحقيقة الاسئلة كتيرة جدًا، وبتحتاج حد خبرة يجاوب عليها، وده هدف First Step الأساسي، أن يجاوب على الأسئلة اللي بتدور في دماغ الطلبة اللي لسة داخلين سنة أولى، ويرد على اسئلتهم بخبرة ومنطق.

فسواء أنت دخلت الكلية بتنسيق أو برغبتك، فانت لسة تايه برضو! وعندك رهبة في التعامل مع الناس، لأنها مرحلة جديدة في حياتك.

First Step هيحللك كل المشاكل ديه، وهيخلصك من الرهبة والحيرة اللي عندك، وهيخليك داخل الكلية واثق من نفسك، وفاهم كل حاجة حواليك.

لو حابب تحضر معانا سجل فى الفورم دي : Minders’21 First Step

اترك تعليقاً