First Step 8 Documentation

First Step Documentation

لما نيجي نتكلم عن حاسبات، بنعرف إنها طريق كبير جدًا، صعب توصله إلا بعد عوائق كتير هتقابلها في حياتك؛ لأن طبيعي عشان توصل لحاجة، أنت محتاج تتعب وتعافر عشانها، بس في الطبيعي بنحتاج حد يدلنا نمشي إزاي عشان منقعش من البداية، محتاجين حد يدي لينا مفاتيح لبيبان مغلقة، هتساعدنا نوصل في طريقنا، وده كان هدفنا.. إننا نحطك على أول الطريق، ونديك المفاتيح اللي هتساعدك.

طبعًا عرفنا إيه هي مايندرز بشكل مفصل، وإيه هو الشكل اللي بيتكون منه التيم، وده عن طريق بشمهندس معاذ سلامة، وبشمهندس ياسين ايمن.

General Department

أحنا بنتعلم الأساسيات لكله، مش في حاجة معينة

بدايتنا كانت مع بشمهندس أحمد علاء، اللي كلمنا عن الكلية بشكل عام، وكانت نصيحته ليكم..”اهتموا بسنة أولى وتانية، واتعلموا الأساس كويس، وبعد كدة أي تكنولوچي هتتعلمها بسهولة”

وختملنا بمقولة دكتور الرملي الجميلة “أعرف حاجة عن كل حاجة، وأعرف كل حاجة عن حاجة”.

Bioinformatics and Medical Informatics

“البيانات هى الفلوس”

تاني سيشن معانا كانت مع بشمهندس السيد حجازي، اللي كلمنا عن مجال البيو والميديكال، وإيه أهدافهم؟ والفرق مابينهم؟

مش بس كدة.. ده كمان قالنا أمثلة من واقع الحياة وقد إيه المجالات ديه مهمة جدًا في حياتنا.

Software Engineering

أنت بتتعب جدًا، في ظل ترفيه كبير لناس كتير حواليك، علشان في الأخر توصل لي اللي أنت عاوزه

ده كان بشمهندس طارق العبد، اللي كلمنا عن الكمبيوتر بشكل عام، ويعني إيه برمجة، وإزاي الكمبيوتر بيفهم الصور، والكلام اللي بنكتبه.

وعرفنا كمان إن المجال كبير جدًا، وعشان توصل لازم تتعب فيه، وإن البرمجة أفضل مهارة تعلمك الـProblem Solving.

Game Development

مجال الـGaming أصبح مرتبط بحاجات كتير في حياتنا..

ده كان كلام بشمهندس أحمد فوزي، اللي قدملنا سيشن ممتعة جدًا، وكلمنا عن المجال بشكل عام، وشفنا تطبيقات العاب بتستخدم في حياتنا بالفعل، وعرفنا إن تخصصات الـGaming تتخطى الـ80 تخصص، وكمان اتكلم عن شغل المجال في مصر، اللي موجود بكثرة في شركات الدعاية والاعلان.

Mobile Application

الأخطاء بتعلمك أكتر من الدروس اللي بتتعرض عليك

ده كانت نصيحة البشمهندس الرائع عمر نوح، اللي كلمنا عن مجال تطبيقات الموبايل، وإزاي نمشي فيه؟، وأحنا كمطورين بنبص عليه إزاي؟

وكمان كلمنا على مدى التطور اللي وصلناله على مدار السنين، وكلمنا عن الأدوات الحديثة اللي بقت تسهل المجال لأي حد حابب يتعلمه، وده ميمنعش طبعًا إننا نهمل الأدوات الأساسية المستخدمة قديمًا لأن هي اللي هتفهمك أصل الحاجة.

Web Design and Development

الحل أنك تختار القطر اللي هتركبه

ده كانت بداية بشمهندس محمد عمرو اللي كلمنا عن مجال الويب، وعرفنا إيه الفرق بين تطوير وتصميم صفحات الويب.

وكمان عرفنا إن المجال مش مجرد بوست، وإنك عشان تتعلمه محتاج فترة، وديه بتعتمد من شخص للتاني، وعرفنا مصادر مفيدة نتعلم منها على حسب طبيعة كل شخص.

وختم بنصيحة.. “حاول تتعرف على أكبر عدد من الناس، عشان لما حد فيهم يشتغل، هياخدك معاه”

Cyber Security

وطبعا مش هننسى السيشن المنتظرة لبشمهندس عمرو فهمى، اللي كلمنا فيها عن مجال امن المعلومات، وفهمنا إنه مش مجرد اختراق، وإنما هو بينقسم لحماية وهجوم، وفهمنا كل حاجة فيهم، وكمان كلمنا عن أهم الوظايف فى المجال..

وعرفنا كمان مسابقات زي الـCTF، وقد إيه هي بداية مهمة لأي شخص حابب يبدأ في المجال.

UI/UX

وختامنا كان مع بشمهندس باهر تامر، اللي كلمنا عن مجال الـUI/UX، وعرفنا إيه الفرق مابينهم، وكمان كلمنا عن الشغل، وده بيرتبط على حسب تخصصك في الشركة، وعرفنا المراحل والخطوات اللي بنمر بيها عشان ننفذ مشروع كامل.

مش بس كدة كمان.. دا قالنا عن الـJob Titles المتاحة بشكل كبير، وكلمنا عن كل حاجة فيهم عبارة عن إيه.

وبكدة وصلنا لنهاية القصة، ونهاية القصة هي بداية لوجودنا في حياتكم، هنفضل معاكم على طول في أي وقت، ولو احتاجتم أي حاجة مننا أحنا معاكم؛ لأن ده هدفنا كلنا.. إننا نساعدكم، ونسهل عليكم الطريق.

اترك تعليقاً