متهم يوكل روبوت في قضيته فما السبب؟

سنة 1997 كانت واحدة من اهم المباريات في تاريخ البشرية جاري كاسباروف واحد من اعظم لاعيبة الشطرنج في التاريخ وسنة 1978 كاسباروف كان أصغر لاعب يصل لبطولة الإتحاد السوفيتي للشطرنج كان ساعتها عنده 15 سنة، سنة 1983 كان المركز الثاني علي العالم والمركز الأول كان الأسطورة كاربوف، وسنة 1984 كاسباروف أصبح الأول علي العالم، وأخيرًا سنة 1985 كاسباروف كان أصغر بطل عالم في لعبة الشطرنج .

ولو فيه حد ممكن يمثل البشرية أمام عملاق وزنه 2 طن من صنع شركة (IBM) بيؤدي 200 مليون عملية حسابية في الثانية الواحدة ومصمم خصيصًا للعب الشطرنج ويسمي (Deep blue) فمفيش غير كاسباروف الذي بيمتلك مخ وزنه 2 كيلو تقريبا، و دي مكانتش أول مباراة قبلها.

كاسباروف هزم جهاز IBM وأبهر العالم كله وحافظ علي صورة البشرية امام اختراعاتها، ولكن المرة دي مهندسين IBM اتعلموا من اخطائهم في المباراة السابقة وفي أمل أن Deep blue يكسب كاسباروف.

صدمة كاسباروف

وفي أول مباراة من الستة كاسباروف يكسب بسهولة وثقته في نفسه زادت وفي المباراة الثانية Deep blue يكسب بحركة خبيثة جدًا لأن كاسباروف أفتكر أنه فهم طريقة لعب الجهاز وهي أنه طالما جاله فرصة إنه ياكل يبقي هياكل فا كاسباروف فكر انه يحطله طعم لكن في حركة صادمة جدا من الجهاز يقرر انه مش هياكل الطعم.
التصرف اللي صدر عن الكمبيوتر تصرف عقلاني جدًا والحركة اللي هو عملها تشل كاسباروف في الاربع مباريات القادمة وابتدى كاسباروف يشك في فريق شركة IBM وقال ساعتها ان مستحيل الحركة دي تصدر إلا من إنسان.
وبدأ يحس إنه مش بس بيواجه جهاز بقدرة تنبؤية عالية و 8 مهندسين بيغيروله في اللوغارتميات لا دا كمان ممكن يكون في لاعب شطرنج محترف بيساعدهم وبعد اللي حصل دا خلاص كاسباروف معدش قادر يركز، كاسباروف اتعادل 3 مباريات وفي المباراة الاخيرة يخسر!!!

وبكدا يكون كاسباروف لأول مرة في تاريخه يخسر مباراة في أقل من 19 حركة وأول مرة يخسر مباراة من كائن حي او مش حي من سنة 1985 . 

ومن هنا نبدأ نسأل نفسنا طالما الذكاء الاصطناعي قدر يهزم أعظم لاعب شطرنج في التاريخ يبقي ليه ميهزمش احسن مهندسين؟ ليه ميهزمش احسن اطباء؟ ليه ميهزمش احسن محاميين؟ يعني هل مثلا ممكن في المستقبل نشوف الروبوتات بتحل محل الانسان في الوظائف دي وبتأدي العمل بكفاءة أعلى من الانسان وكمان في وقت أقل؟ 

المبرمجين في وقتنا الحاضر بقى عندهم كم من المعلومات هائل لأن في سيرفرات بتسجل كل حاجة فبقى عندنا ما يسمي بالbig data ومع كمية المعلومات دي الاجهزة بدأت تتعلم إيه الحاجات اللي ممكن تجيبهالك علي أساس الحاجة اللي انت بتطلبها يعني بإختصار الأجهزة دلوقتي مش بتتعلم منك انت كإنسان وبس لا دي كمان بتتعلم إزاي تتعلم يعني جهاز Deep blue قبل مباراة كاسباروف كان مذاكر 700.000 مباراة شطرنج . 

المحامي الآلي

وفي عام 2012 في 240 شركة حصلوا علي 750 مليون دولار علشان يعملوا محامي وهو مش محامي بالصورة الكاملة هو روبوت بيؤدي بعض وظائف المحامي يعني عن طريق الذكاء الاصطناعي يقدر يحدد ايه الاوراق المهمة والاوراق الغير مهمة في القضية.

الملخص ان البشرية بذكائها قدرت تخترع ذكاء يغلب ذكائها والسؤال اللي دائمًا بيطرح نفسه هل الاجهزة دي في يوم من الايام هتحل محلنا ومش هنلاقي شغل؟ وممكن كمان يثوروا على الانسان ويطالبوا بحقوقهم؟ وهل ممكن يحصل الاسوأ ويعملوا في الإنسان زي ما الإنسان عمل في الحيوان؟ كلها اسئلة هنعرف اجابتها في المستقبل ولكن لو في نصيحة ممكن نقولها فهي هتكون خليك صانع (أتعلم البرمجة) لأن العصر القادم مش للناس النشيطة أبدًا العصر القادم للمبرمجين الكسالى !!

اترك تعليقاً