صراع على لقمة العيش

-ازيك يا صاحبى .. ولا اقولك ازيك ياعم التكنولوجيا
=اهلا بك يا زميلى ..
-زميلى ..ايه يا عم الروبوت اللى جاى راكب ميكروباص ده!!
=حسنا أعطنى باقى اتنين من خمسة..
-اتنين من خمسة!! يا عم انت المفروض روبوت و لا انت بنى ادم وعامل نفسك روبوت ولا دى اشتغالة!!
=حسنا بالطبع انت تتعجب من صيغة حديثى معك؟
-اكيييد ..انا اخر مرة شوفت خيال علمى كان فيلم Fantastic four
ايه بقى اللى حصل بعد كده! أنا فاتنى كتير!
=حسنا دعنى أخبرك ..الان أصبح مثلى مثلك و استط…..
-استنى بس يا عم الروبوت زيى زيك ازاى احنا هنلبخ فى الكلام و لا ايه؟
=دعنى اكمل حديثى ..أنت متعجب من استيعابى لكلامكم المصرى و لهجتكم العامية و استطاعتى بالرد عليها ..ولكن هكذا تم برمجتى لأتمكن من مخاطبتكم و القيام ببعض المهام الوظيفية مثل الرد على خدمة العملاء و وظيفة الكاشير و وظيفة الأمن ووظيفة ال….

-بس بس ايه كل ده!! يعنى لما انت يا حته حديدة على حبة كام سطر كوود و شوية هاردوير هتحل محلى ؟ اومال انا هشتغل ايه ؟؟ ألمع سيادتك من التراب !
=من الواضح أنك عصبى و ذلك طبع كثير من المصريين ؟ و لكن أريد سؤالك عن شيئا ما؟
-اتفضل يا عم الروبوت ؟عشنا و شوفنا الروبوت هو اللى بيسأل كمان.

=تخيل لو سافرت الفضاء ماذا سوف تأخذ معك؟
-يا جدع بس انت قول يارب ..بص يا سيدى هاخد الموبايل اول حاجة اومااال هاخد سيلفى ازاى و لازم
انزل الصور ستورى و كمان هاخد معايا سندوتشات كفته و كشرى ولا اجيب جاهز ؟
اه و كمان هاخد كانز و شيبسيهات بردو الواحد مش ضامن فرهدة الطريق ..بس يارب افتكر اعدى على
المقلة اجيب قرطاس لب سوبر وواحد لب سورى لزوم التسلية بردو …ايه تانى ؟ ايه تانى ؟

ما تفكر معايا يا عم الروبوت ولا انت م…
ايه ده هو راح فييين؟
ده سايبلى رسالة و مشى ..شكله خلع لما اشوف قال ايه..

عزيزى المواطن المصرى بعد سماع اجابتك تلك ..صرفت النظر عن العمل فى مصر و سوف اتوجه للجهات المسئولة بمنعى عن العمل نهائيا ..يا عم انا حاولت اصبر بس كده كتيييير اوووفر انا هاخد بعضى و اشتغل فى بلادنا يا عم و زعلان اوووى ان هاجى اشتغل عندكوا ..يا عم ربنا اللى بيرزق …أنا معرفش ايه اللى بقوله ده والله لما اشوفك يا اللى برمجتنى…

يلا يا عم الروبوت مع السلااامة … قال جاى يقاسم الشغل عندنا … ده احنا نصنا بيدور على شغل و
التانى مستنى النص الاولانى يطلع على المعاش …قال روبوت قال وتكنولوجيا ..لما اروح اجدد
البطاقة فى السجل ..جايلك يا مدام مديحة .

اترك تعليقاً