تطبيقات أندرويد وجودها يهمك

من أكتر الحاجات اللي بتهمنا دلوقتى كشباب هي إننا نكون معاصرين للتكنولوجيا. و اللى بيربط بينا و بين التكنولوجيا هو موبايلاتنا اللى سهلت كل الوسائل علينا، سواء الوسائل التعليمية أو الترفيهية و عشان كده هنقولكوا بعض من التطبيقات اللى بتسهل استخدامنا للموبايل و بنبقى محتاجينها ف يومنا. تطبيقات  أندرويد وجودها يهمك. 

 

1- Flyperlink

FPL هو متصفح نت عادي بس اللي مميز فيه هو إنه بيفتح ف pop-up زي الماسنجر كده. طب و ده هيهمك ف أية؟!

لو انت فاتح مثلا فيسبوك و عايز تدخل على لينك بس من غير ما تخرج من الفيسبوك فكل اللي عليك انك تدوس ع اللينك و هتلاقية فتح ف pop-up على جنب و ممكن ترجعله ف أي وقت لو مش عايزها دلوقتي.

و لو أنت شغال على أى  ابليكيشن تانى و أحتاجت تدور على جوجل على أى حاجة فأنت مش محتاج تقفل شغلك عشان تفتح المتصفح و ممكن برضو تسيب ال pop-up موجودة قدامك ع الشاشة لوقت ما تحتاجها.

 

2- IdeaNote

التطبيق دة هيساعد المبدعين و أصحاب الأفكار و بنا إننا مش بنسيب الموبايلات من إيدينا و ده بيقتل إبداعنا و حتى لما بنبدع و نفكر ف فكرة بننساها بعد دقيقتين ف دة أحسن حل عشان نحافظ على كل فكرة بتجيلنا. طب أزاي؟! من أسمة باين أنه برنامج بتحط علية أى نوت أنت عايزها. طب و أية الجديد ما كل موبايلاتنا بتعمل كدة؟

  1. البرنامج بيظهرلك ف floating window يعني بيبقى خط رفيع ف جنب الشاشة و انت تسحبة منه فأنت مش مضطر تقفل أى حاجة عشان توصلة و مش محتاج تدخل تدور علية لحد ما تنسى كنت عايزه لية اصلا.
  2. مجرد ما تسحبه من جنب الشاشه هيطلعلك النوتس اللي كنت كاتبها قبل كده على جنب الشاشة برضو ف مش مضطر تدخل ع البرنامج مخصوص عشان تفتكر اي نوت.
  3. النوتس دى مش بس كتابة، ممكن تبقى صورة، تبقى ريكورد، تبقي تودو تاسك( To do task)، تذكير(reminder)، لينك، و ممكن تسجل فويس بصوتك و هو يحولة كتابة و حقيقى جوجل مبهرة يعني و شغال تحفة. و لو عايز تسمع الريكوردات فأنت مش محتاج تدخل ع البرنامج عشان تسمعها و ممكن تسمعها من برا عادى.
  4. سهولة التحكم ف مكان الفلوتينج ويندو و النوتس ع الشاشة.
  5. ممكن تبعت النوتس بتاعتك و ممكن تحطهم ع التقويم بتاع الموبايل و تحط تايتل لكل نوت و تضيف كلام مع كل ريكورد و حاجات زي كدة كتير.
  6. تقدر تغير theme البرنامج يعني شكلة و ألوانه من اختيارك.

 

3- AirDroid

و دة برنامج مش بس للموبايل. ده للموبايل و الكمبيوتر ف نفس الوقت و هو بيستخدم للربط بينهم و كل اللى عليك انك تنزل التطبيق ع الموبايل و الكمبيوتر و تسجلهم هما الأتنين علي نفس الشبكة. طب و هتستفيد أية من دة؟!

  1. النوتيفيكاشنز( notifications) : تقدر تشوف و ترد ع النوتيفيكاشنز بتاعة الموبايل من الكمبيوتر و تقدر ترد ع المكالمات و الرسايل برضو من ع الكمبيوتر.
  2. AirMirror: دي بتمكنك انك تشوف شاشة الموبايل من على الكمبيوتر. يعني مثلا لو بتلعب لعبة ع الموبايل تقجر تشوفها و كمان تتحك فيها من الكمبيوتر و أستمتع بقى. و تقجر كمان تستخدم أى برنامج عندك ع الموبايل من خلال الكمبيوتر.
  3. Remote Camera: يعنى لو أنت حاطط موبايلك ف مكان و فاتح الكاميرا…تقدر تشوف كل حاجة من خلال الكمبيوتر و سلملى ع المخابرات.
  4. Find phone: لو موبايلك ضاع أو أتسرق فتقدر تعرف مكانة من خلال التطبيق على الكمبيوتر و تقدر كمان تتحكم أنك تقفلة أو تمسح البيانات من علية.
  5. File Transfer: تقدر طبعا تنقل كل اللى انت عايزة من الموبايل للكمبيوتر و العكس كمان.

و ده لينك التحميل للكمبيوتر Download for windows

 

4- Edge Action

البرنامج دة من أكتر البرامج اللى بتخلى موبايلك عملى و أسهل ف الأستخدام. هو عبارة عن سلايدز بتفتح من جنب الشاشة و ممكن تخليها تاخد الشاشة كلها أو نصها بس و أنت بتحدد أية هي محتويات السلايدز دي. طب زي أية او أية مميزات الابليكيشن؟!

  1. اول سلايد او إيدج هتلاقى فيها تطبيقات اللى انت ممكن تختارها بنفسك.
  2. تاني سلايد بتبقى للcontacts و لما بتدوس على أى كونتاكت فيهم ممكن تتصل او تتواصل معاه عن طريق أى ابليكيشن عندك ع الموبايل.
  3. الأيدج الثالثة بتبقى music player و دي بتخليك تشغل ميوزك و تتحكم و تقلب و كل الخواص دي من خلال الأيدج دى.
  4. و فى واحدة بتبقي إعدادات و غيرها للتقويم و غيرها بيبقي فيها بوصلة و مسطرة و فى سلايد لل shortcuts اللى بتختارها و في لل tasks list و للساعة العالمية و فى غيرهم كتير ممكن تنزلهم.
  5. تقدر تتحكم ف ترتيبهم و أنهى سلايدز عايزينها و أنهى لا و برضو تقدر تغير الألوان و الخلفية للسلايدز و تتحكم كاملا ف كل الوجهة.

 

5- CamScanner

هو برنامج مفيد جدا للملفات(documents) و من خلاله بتعمل سكان لأى صورة و تحولها pdf و البرنامج ده عندة كذا ميزة تانية و منها:

  1. في خاصية تصوير البطاقة وش و ضهر ف نفس ال pdf و بجودة عالية و كمان فى للباسبور.
  2. فى أداة ذكية جداً بتشيلك أى حاجة مالهاش لازمة من الصورة.
  3. ممكن تعمل crop للصورة و تخليها الحجم اللى أنت عايزة و بالشكل اللى أنت عايزة و حقيقى بتخليك تتحكم بشكل مرن جداً.
  4. تقدر كمان أى ورقتين جنب بعض أو كتاب و تحولهم pdf.
  5. و تقدر تسكان كمان QR Code أو تعمل Greeting card بخط أيدك وكل اللي عليك انك تختار الديزاين و تكتب اللى عايزه على ورق و تصورة و هو هيتكتب ع الكارد بخطك بس من غير الورق و بيبقى شكلة لطيف.
  6. ممكن تحط باسورد لأى ملف و تضم أكتر من ملف مع بعض و تغير أماكن الملفات بسهولة  و تعرض و تعدل ف الملفات الأساسية بتاعتك و تتحكم ف مقاس الpdf.

 

6- Shazam

لكل اللى بيحبوا الأغانى و بيحبوا يعرفوا أى اغنية جديدة بيسمعوها ف أى مكان ف دة اكتر برنامج هيساعدكوا. بكل بساطه لو أنت ماشى ف الشارع مثلا و سمعت أغنية و عايزها و مش عارف أسمها فكل اللى عليك أنك تفتح البرنامج و تدوس ع الزرار و هو هيطلعلك الأغنية الشغالة و كمان تقدر تشوف الكلمات و تقدر تسمع أى اغنية أنت عايزها من علية و بالكلمات برضو و كمان توصلة بال Spotify وتشغل الplaylist بتاعتك و دلوقتى البرنامج بقي متاح فية كمان إنه يطلع ف pop-up عشان تستخدمة أى وقت.

اترك تعليقاً