الميمز مش للضحك

عمرك سألت نفسك قبل كده يعنى إيه الميمز اللى بنسمعها فى كل مكان دى وهل هى فعلًا مقصود بيها الصور اللى عليها كتابة بس ولا ممكن يكون ليها معاني تانية؟
تفتكر الميمز دي مفيدة وليها أهمية ولا الهدف منها الضحك وبس؟

قبل أى حاجة يعنى إيه كلمة ميم؟

كلمة الميم هى مفرد كلمة الميمز وتعني فكرة، أو تصرف، أو أسلوب بينتشر من شخص لآخر لنقل ظاهرة أو معنى معين، وبيتنقل عن طريق الكتابة، أو الحديث، أو الإيماءات، أو الطقوس، أو أي ظاهرة أخرى قابلة للتقليد يربط بينها صورة عامة.

ظهرت كلمة ميم لأول مرة فى كتاب إسمُه الجين الأناني لعالم الأحياء ريتشارد دوكينز” وكانت تعني وحدة قادرة على التضاعف ولها أهمية فى شرح التصرفات البشرية والتطور الثقافي.

هل الميمز دى ليها تأثير فى المجتمع؟ وهل ممكن يكون ليها تأثير عليك أنت شخصيًا؟

الميمز فى الفترة الأخيرة انتشرت بشكل كبير جدًا في العالم كله بسبب إنها سهلة وبسيطة ومُتاحة للجميع ومش محتاجة غير فكرة بس.

فاممكن أى شخص يستخدم فكرة في دماغه ويعمل بيها الميم الخاص بيه وينشُره على أكتر مكان فيه تواصل بين العالم كله وهو السوشيال ميديا.

وده اللى ساعد في انتشار الميمز في العالم كله، وبقى فيه ميمز عالمية ممكن أى شخص في العالم يفهمها ويعرف الغرض منها فتخيل كده إن ممكن يكون شخص عمل ميم في أمريكا والميم لف ووصل لشخص في الأرجنتين ولف أكتر ووصل لشخص تانى في مصر وفرنسا واستراليا واليابان وكل شخص من دول تانية بدأ يستخدمه وينشره أكتر ويبعته لاصحابه وهكذا.

فالميم اللى عمله شخص في أمريكا لف ووصل لناس من بلاد وثقافات مختلفة وكلهم فهموه فتقريبًا كدة الميمز أصبحت لغة تواصل عالمية بين مختلف الناس والثقافات والمجتمعات وتعتبر أسهل وأسرع طريقة للتواصل في العالم كله.

هل فكرت إن الميمز ممكن تكون بتساعد فى نشر الوعي؟

الميمز زى ما قولنا هى عبارة عن فكرة معينة بيكون مصدرها شخص ومش شرط تكون هدفها الضحك!

بس ممكن تكون بتوصل فكرة لناس أول مرة يشوفوها أو ميكونوش واخدين بالهم منها زي مثلًا إن شخص يعمل ميم عن خطورة الخروج من البيت في الفترة دي بسبب فيرس كورونا، فشخص يكون مش حاسس بخطورة الموضوع يشوفه فيحس بإن وجودُه في البيت هيحافظ عليه وعلى اللى حواليه.

وهكذا، فاممكن ميم بسيط جدًا يساعد شخص في إنهُ يعرف معلومة مهمة تساعده في حياته والميم البسيط ده سهل ينتشر من شخص للتانى فاهو كدة يُعتبر نشر الوعي وعرف ناس كتير خطورة الموضوع وساعدهم في إنهم يحافظوا على نفسهم.

طب إنت تعرف إن ممكن الميمز تساعدك في إنك تعبر عن مشاعرك وتخرج المشاعر السلبية اللي جواك؟ 

الميمز ليها دور كبير جدًا في إنك تحس بسعادة وراحة عمومًا في إنك بتضحك عليها أو إنك تشوف ميم فا تحس إن الميم دة بيعبر عنك أو عن اللى جواك اللي إنت مش عارف تحكيه لإن أكيد فيه شخص تاني حاسس نفس الإحساس اللي إنت حاسس بيه.

إذا كان الإحساس دة حلو أو وحش فابيحاول يخرج المشاعر اللى جواه دي في شكل ميم، وبما إن الميمز بتنتشر بسرعة وفي كل الناس فالميم دة هيوصلك، ف ده هيحسسك بسعادة لإن إنت لقيت حاجة أخيرًا بتعبر عنك أو عن اللى جواك.

اللي إنت مش عارف توصفُه، أو تحكيه لحد وهتحس إن فيه حد حاسس بيك، أو حاسس بالمعاناة اللى إنت بتشوفها وهكذا، فالميمز ممكن تساعدك في تخطى مود سيء أو إحساس بالكبت أو الاكتئاب وتخرجلك المشاعر السلبية اللي جواك.

تفتكر حاجة زي الميمز ممكن تساعد في انتشار الأفكار والآراء؟

الميمز ممكن تساعدك في إنك تعرض رأيك فإنت ممكن تعمل ميم بيعرض فكرة، أو رأى معين وتنشرُه فهتلاقى ناس مؤيدة لرأيك، وناس معارضة، وناس مكانتش شايفة الرأي ده أصلًا وخدوا بالهم منُه من الميم بتاعك.

فاهتبدأ تتناقش مع الناس المعارضة لرأيك، وتقنعهم بوجهة نظرك وهما يحاولوا يقنعوك برأيهم وده بينشر ثقافة الرأي والرأي الآخر وبيساعد في انتشار الأفكار.

طب فكرت قبل كده إن ممكن ميم يخليك تشترى منتج معين؟

الميمز ليها دور كبير جدًا في التسويق والدعاية والإعلان لإنها سهلة، وبسيطة، وبتنتشر بسرعة، ولغة بيفهمها العالم كله فمثلًا ممكن شركة تكون بتعلن عن منتج معين، فتعمل ميم بيظهر فوائد المنتج وأهمية استخدامُه ولو كان الميم حلو فعلًا ومعبر، فاده هيساعد في انتشار الميم وبعدها انتشار المنتج وده هيخلي ناس أكتر عارفين الشركة.

فاممكن ميم بسيط يكون عامل رئيسي في شهرة شركة محدش كان يعرفها بس كل اللى عملته مجرد ميم حلو.

الميمز مش الهدف منها الضحك بس ممكن ميم بسيط يغير حياتك للأحسن ممكن يعرفك حاجة مكنتش تعرفها، ممكن ميم يعبر عنك، ويخرج المشاعر السلبية اللى جواك، ممكن يساعدك في الوقاية من مرض معين، ممكن ميم يساعد شركتك فى إنها تتشهر وتكسب فلوس، ممكن بسبب ميم بسيط حياتك تتغير وتبقى أحسن.

اترك تعليقاً